/*Google Analytics*/ data-mobile="true" data-tablet-width="1024" data-mobile-width="580">

Brigitte hat es gewagt

Ig has gwagt....

Brigitte hat es gewagt... alleini i die Bikeferie z‘go, Trails z‘fahre woni vorhär aghaute hät , überne Houzhufe z‘fahre, i chaut Pool z‘springe und Averna z‘probiere. Aber eis nachem angere…. [ Original-Bericht ]

Mini Areis ha ig mit em Car bis Follonica gmacht und nähr isch mi dr Franz vo “mtbeer“ cho abhole . So ha ig no dr ganz Tag zur Verfüegig gha, ha no z‘Mörgelet , s‘Zimmer bezoge und e Abstächer uf Massa Marittima und ufe Liegistueh gmacht. Am 7ni isch de s‘Apéro und s‘gmeinsame Nachtässe agstange. Dr Empfang isch sehr persönlech gsi und ig ha sofort mit de Lüt chönne plöiderle.

Und jo, es isch eso, dr Salvo chocht hervorragend ! So hei mir e gmüetleche Kennelern-Obe gha.

Nähr loufts eigentlech immer glich ab, z’Morge ässe , parat mache und mit em Bike a Träffpunkt . Bim Träffpunkt hei mir zwöi Gruppene gmacht: Gruppe „Ferraris“ (numme liecht schnöuer) und Gruppe „Cinquecento“ (liecht lengsemer, aber numme es Mü ).

Mit emene früsche Tröpfli Öl ischs de los gange . Scho sehr früeh hei mir absits vo de Teerstrosse chönne fahre und scho gli mou die erschte paar Trails . Es het Spass gmacht und trotzdäm freut me sich ufe Cappuccino . Nach dr Tour chame zäme zMittagässe und nang vo dr Tour verzöue oder uf guet bärndütsch gseit „plagiere“.
Dr aabrochnig Nomi steit zur freie Verfüegig , ussert me nimmt am „Bikeputzkurs“ , ar „Wy-Degustation“, am „Bsuech Ölmühli“ oder anere angere organisierte Aktivitäte teil.

Ig has sehr guet gfunge , dass me säuber sProgramm cha wähle . Ebefaus chame id Sauna , go jogge , bir Erika go lädele , im Pool go schwümme oder ufe Ligistueu lige.

Sehr idrücklech isch d‘Elba-Tour am Zischti gsi! Wunderschöni Landschaft , schöni Trails , grosse Cappuccino und mängisch asträngendi Högerli , wo 2 mou 10 min göi.

Ig ha ou dr Fahrtechnikkurs am Mittwuch sehr guet gfunge. I dene paar Stüngli ha ig vom Housi sehr vöu glehrt .

Ou wenn me ungerwägs es Problem mit em Bike het, wird grad gluegt und gflickt oder azoge , danke Erika! Ig ha e wunderschöni , sunnigi und luschtigi Bike-Wuche dörfe erläbe, sicher ou dank de guete und spannende Teilnähmer!

Es grosses Merci geit a: Hampi, Markus, Anita, Pius, Friedel, Kamikaze Rey, Manu, Renate, Otti, Kristina, Markus, Claudia, Viktor, Irene, Hans. Danke für die luschtige Gschichte über Tubuless , Sattufüdli, ängi Bikehose oder nid, Bohne dr ganz Tag und die ganzi Nacht , Bruttalo-Trail und so witer.

Ebefaus es Dankeschön ad Organisatore und Guides, Erika, Housi und Franz.

Es genials Programm heit Dir üs zur Verfüegig gstöut Super Organisation, i schöni Toure und spannendi Erzählige und Gschichte!

Es grosses Excüsé , dass dr Bricht i mim Chrüppeli-Dialäkt gschriebe isch.

Brigitte Seiler

Samstag, 14. Oktober 2017